He mihi
I. E ngā purapura ora, e ngā mana, e ngā reo o ngā hau e whā, tēnā koutou, tēnā koutou, tēnā koutou katoa. Nei rā te reo o mihi ki a Ngāi Tūāhuriri, Kāi Tahu whānui hoki, tēnā koutou.
II. Ko te taitara o tēnei pūrongo mō ngā tūkinotanga me ngā whakahapatanga a te Rangapū Katorika o Ngā Parata o Hato Hoani o te Atua, ko “Stolen lives, Marked souls” i takohatia mai e ētahi purapura ora o te kura o Marylands, o te Tarati o Hebron me te whare whakapani o Hato Hōhepa. E whakaahua ana te taitara i ngā taumahatanga i pā kino nei ki ngā purapura ora nā runga i ō rātou wheako i ngā ringa o ngā parata i ēnei whakahaere. Tēnā koutou i tā koutou koha mai.
III. Ka nui te whakamānawa a te ngākau ki ngā tini purapura ora i tuari i ā rātou kōrero hautoa mō ngā tūkinotanga i pā kino nei ki a rātou me ngā taumahatanga i tau ki ō rātou ao, me ngā ao o ō rātou whānau. He tuatahitanga tēnei ki ētahi, te whāwhāki i ō rātou wheako. I kawe rātou i a rātou anō i runga i te kaha me te wairua whakaea me kore noa e tūpono ka kore rawa tēnei momo tūkino e pahawa i tētāhi whakahaere hāhi, ā haere ake nei. Kei te mōhio mātou ki ngā uauatanga o te hoki anō ki te hahū ake i ō rātou wheako mō te ketuketunga/uinga, me ngā whakaaweawenga ki ō rātou hauora matawhaiaro. Tēnā koutou i haere whakamua mai.
IV. Ki ngā purapura ora o te Kura o Marylands, o te Tarati o Hebron me te Whare Whakapani o Hato Hōhepa kāore i haere whakamua mai ahakoa rā ngā take, tae atu rā ki ngā ārei whakawhitiwhiti kōrero, e rere atu nei te aroha me te whakaaro nui.
V. Ko te pōuri nui, he maha ngā pārurenga i whai wheako ki ngā tūkinotanga me ngā whakahapatanga i ēnei whakahaere, kua riro ki tua o te ārai. Ka kore rātou e warewaretia. Nei rā te mihi ki a rātou, ki ō rātou whānau me ērā i waha i ngā kōrero a ō rātou kurupounamu kua wehe ki te pō.
VI. Ko Ken Clearwater me Male Survivors Aotearoa ngā pokowhiwhi kaha i tautoko i ngā purapura ora i kuraina ki te Kura o Marylands, ki te Tarati o Hebron me te Whare Whakapani o Hato Hōhepa, i tautoko hoki i ō rātou whānau, i mua tonu, ā, i te wā e haere ana tēnei ketuketunga. Ka mihia tā rātou i kōkiri ai me te tautoko hoki i ngā purapura ora i whakaputa kōrero mō tēnei ketuketunga.
VII. Ka mihi rā ki ngā kaiwhakaatu ‘whāki’: tētahi parata o mua o Hato Hoani o te Atua, tētahi kaitiaki i Marylands, tētahi kaiwhakarite hōtaka, ā, nāwai ka piki tūranga ki te kaiwhakahaere ki te Tarati o Hebron me Tākuta Michelle Mulvihill i mahitahi me ngā parata o Hato Hoani o te Atua i ngā tau 1990, ā, i hoatu taunakitanga i te whakawātanga tūmatawhānui o te ketuketunga. I whakakaha ake ngā taunakitanga a ēnei kaiwhakaatu i ngā whakatau mō tēnei pūrongo.
VIII. Ka mihi rā ki te purapura ora, ki a Darryl Smith, nōna ka takahi i te ara roa o te manatika ka whakaputa i a ia anō āna kōrero mō te nui o ngā tūkinotanga me ngā whakahapatanga i pā ki a ia i ngā ringa o ngā Parata o Hato Hoani o te Atua, ki Aotearoa Niu Tireni nei, me Ahitereiria hoki.
IX. Ka mihi rā a Cooper Legal i ā rātou mahi ki te āwhina i ngā purapura ora e pai ai tā rātou whai manatika mō ngā tūkino i pā ki a rātou mai i te Hāhi Katorika, i a Hato Hoani o te Atua, i Ngā Pirihimana o Aotearoa me ngā ratonga a te Kāwanatanga Whakawhanake Pāpori, me te Mātauranga.
X. Ka mihi rā te kōtuituinga tangata a ngā purapura ora me ngā kaihāpai, tae atu rā ki ‘Network of Survivors of Abuse in Faith-based Care; SNAP Aotearoa New Zealand (Survivors Network of those Abused by Priests); me te National Association of Adult Survivors of Child Abuse’.
XI. E whakamānawa atu nei i ngā kupu āwhina ki a mātou mai i tō mātou Pou Tikanga, me ngā karakia i takohatia ki te ketuketunga ka noho hei anga mō tēnei pūrongo . E hāngai pū ana ki te tikanga Māori, a, he whakaū i te kawenga o te kaupapa i runga i te tika.
XII. Ka mihia rā ngā kaiārahi me ngā rōpū tohutoro o te ketuketunga, tae atu rā ki a SAGE me Te Taumata, nā rātou mātou i āwhina me ā rātou kōrerorero, kupu āwhina, whakapae anō hoki.
XIII. Ka mihi ake ki te hunga whai pānga mai ki te ketuketunga i tautoko i a mātou ki te whakaputa i tēnei pūrongo : tō mātou hekeretari, tae atu rā ki ngā mātai aronga, ngā rōia, ngā kaupapa here, ngā rangahau, ngā pāohotanga, ngā tūhonohonotanga, ngā kōrero a ngā purapura ora, te tautoko mai a ngā pakihi, ngā ratonga tautoko, ngā tari whakahaere me ngā ringa hāpai. Ka rere anō hoki ngā mihi ki te rōpū ārahi i te ketuketunga me ngā mema o te paewhiri i āwhina i te taha ki te ture. Tēnā koutou i whakapeto ngoi ki te tautoko i ngā purapura ora me te whakatōpū i ngā pārongo me ngā taunakitanga i taea ai e mātou te kite mō te wā.
